Guest
Айчүрөк Саркишева көп жыл Бишкектеги төрөт үйлөрдүн биринде акушер болуп иштеген, учурда жеке менчик медициналык клиникада гинеколог. Маек учурунда ал бойго бүтүүдөн сактануунун ыкмалары, бойдон алдыруунун жолдору, кесепети, эне болууга даярдык тууралуу айтып берди. Ата-эне болуу — өтө чоң жоопкерчилик. Бул ириде жарыкка ден соолугу чың баланы алып келүү. Болочоктогу эне өзүнүн саламаттыгын жакшы карап, керектүү медициналык маалыматтарды алып турса, ал бөбөктүн алты саны аман төрөлүшүнө көмөкчү болот. Акушер-гинекологдун айтымында, аял киши бойго бүткөнгө чейин жана кош бойлуу кезинде дарыгер жазып берген йодомарин менен фолий кычкылын калтырбай ичиши керек. Ал ымыркайдын нерв системасына, жүрөгүнө пайда. Айрым учурда гормоналдык бузулуулардын кесепетинен түйүлдүк өспөй калышы ыктымал. “Көп учурда түйүлдүктүн өспөй калышы 12 жумага чейинки убакта кездешет. Бул калкан безинин иштешинин бузулушуна байланыштуу. Анткени аталган без менен жумуртка бези бир системада иштейт. Калкан безинде гормон жетишсиз болсо, түйүлдүктүн өрчүп-өнүгүүсүнө терс таасир этип, тамактануусу, кан жүгүрүүсү токтойт. Мындай учурда дыкат текшерилип, гормоналдык жактан дарыланып, 6 айдан бир жылга чейин сактанып анан бойго бүтүрсө, наристенин айына жетип төрөлүшүнө жакшы шарттар түзүлөт”, — деди Саркишева. Дарыгер муну менен катар эле бойго бүтүрбөөчү каражаттарды колдонуу, анын зыяны жана пайдасы тууралуу айтып берди.
