Xurshid Davron. Gul haqida sher

XURSHID DAVRON GUL HAQIDA QO’SHIQ (Nikolas Gilyen mavzuida) Bilasizmi, ba’zan tunlari sog’inaman sizni judayam... Istayman men shunda: Tun kabi Sizni mahkam bag’rimga bossam. Istayman men: tomchi yosh bo’lib Yuzingizdan o’tsam sirg’alib. Rashk qilaman sizni: qanchalar Chiroyingiz ochar sirg’alar. Shamol sochgan sochlaringizning Olovida ketsaydim kuyib. Kechalari bosib bag’rimga, Umr qisqa ekanin tuyib – Dalli, telba bo’lgim keladi Ishqingizdan, hasratingizdan. Va sog’inchdan o’lgim keladi Ko’zim uzmay suratingizdan. Bola bo’lib qolsamu sizni Yig’lay deyman mahkam quchoqlab, O’lgim, O’lgim, O’lgim keladi O’z-o’zimni tig’lab, pichoqlab. Qonimdan-da bir gul undirib (Bahorningmas, bo’lsin kuzniki) Shivirlagim keladi asta: “Oling, oling... Bu gul sizniki!..” ХУРШИД ДАВРОН ГУЛ ҲАҚИДА ҚЎШИҚ (Николас Гильен мавзуида) Биласизми, баъзан тунлари соғинаман сизни жудаям... Истайман мен шунда: Тун каби Сизни маҳкам бағримга боссам.