Guest
Цыма сæргълæууæг ахæм бардзырд радта — фыццæгæмкъласонтæн традицион лæвæрттæ фиддонтæй баивын. Мæнг хъусынгæнинаг Регионæн разамынддæттæг центры специалисттæ цылдæр минутмæ рабæрæг кодтой. Сæ куыст уый мидæг ис. Фейк рæстæгыл фенын æмæ йыл мæнггæнæн уац ныффыссын. Кæд фарон республикæйы дыууæ фейкы едтæмæ нæ рабæрæг кодтой, уæд ацы аз фарсастмæ схæццæ сæ нымæц. Æрмæст авд сæ июлы уыд. Регионæн разамынддæттæг центры разамонæг Бæтаты Алексей куыд зæгъы, афтæмæй Украинæйы службæтæ ныртæккæ уæлдай активон сты. Æмæ æрмæст Ирыстоны ныхмæ нæ кусынц. Мæнг хабæрттæ фæзыны æгас Кавказы дæр. Зæгъæм, бирæсывæллонджын бинонтæ сæ цæрæнбынæттæ кæй раивдзысты арæнмæ хæстæг регионтæм. Дипфейк дæр разынд, цæстфæлдахджытæ пайда кæнынц видеойæ. Мæнгарæзт хъæлæсимæ. Кадртыл цыма сылгоймаг эпидемийы рапарахатæй тæрсын кæны Алагиры районы цæрджыты. Адæм тæрсой, мæсты кæной, сæйрагдæр та, хицауадыл ма 'ууæндой, уый фæнды фæсарæйнаг сæрмагонд службæты. Республикæйы сабырдзинад фæцуда, уый тыххæй арæзт у æппæт дæр. Фæлæ мæнг хъусынгæнинæгтæ Регинæн разамынддæттæг центры специалисттæ афойнадыл раиртасынц. Социалон хызтæ æмæ мессенджерты специалисттæ агурынц гуырысхойаг информаци. Цæст дарынц посттæм, кæсынц ныхасæппарæнтæм, цæрджыты курдиæттæм. Зæрдæ истæмæ фехсайдта — уайтагъд æй сбæлвырд кæн. Куы дзуапдæттæг ведомствæмæ бадзурынц, куы базæ фенынц, куы та сæ официалон гæххæттыты æххуыс бахъæуы. Цыфæнды фейкы раиртæстæн дæр сахатæй фылдæр не схардз кæнынц. Фейк арæхдæр апарахат кæнынц мессенджерты. Уым, фыццаг æй чи арвыста, уый зындæр базонæн у. Кæнæ та хъусынгæнинæгтæ æрвыст æрцæуынц æнæном аккаунттæй. Специалистты хъуыдымæ гæсгæ, адæймаг, фыццаджыдæр, йæхи сайын хъуамæ ма бауадза йæ критикон хъуыдыкæнынады руаджы. Исты информаци дæм куы 'рбахауа, уæд æй искæмæ арвитыны размæ ахъуыды кæн — раст у, æви нæ. Кæд дызæрдыг кæныс, уæд профилон ведомствæмæ бадзур
