Guest
З пілігрымкі беларускай моладзі і інтэлігенцыі 12 лістапада 1989 году на ўрачыстасьць сьв. Язафата ў мястэчка Баруны, што на Ашмяншчыне, у былы базыльянскі санктуарыюм Маці Божай, дзе служыў тады пробашчам мясцовай рыма-каталіцкай парафіі сьв. Пятра і Паўла а. Ян Матусевіч, пачалося адраджэньне Уніі ў Беларусі. 9 лістапада 2019 году ў памяць пра гэтую падзею беларускія грэка-католікі зладзілі падзячную пілігрымку да цудатворнай іконы Маці Божай у Барунах. Ірына Дубянецкая — вядомы беларускі філосаф і біблеіст, доктар тэалогіі, якая была ўдзельніцай той гістарычнай пілігрымкі на сьвята Язафата ў Баруны, склала сваё сьведчаньне пра тыя часы. Яна ўзгадала некаторых вядомых удзельнікаў той пілігрымкі, распавяла пра працу а. Яна Матусевіча і пра тое, як нарадзілася ідэя ўнікальнага на той час праекту — першага беларускага рэлігійна-асьветніцкага часопісу «Унія», які выходзіў на пачатку 1990-ых гг.
