Guest
анлайн тут: Невялікая габрэйская сям’я месціцца ў старым драўляным доме ў цэнтры Гомля. Дзядуля Барыс Зямавіч самы старэйшы, разам з ім тут жывуць яго дачка з мужам і ўнучка Ірына. Іх спакойнае існаванне яшчэ дзевяць гадоў назад было парушана загадам мясцовых уладаў аб зносе дому, які паспеў стаць іх радавой каштоўнасцю. Пабудаваны ў 1905 годзе, дом упрыгожаны калісці традыцыйнай для гэтых мясцін вытанчанай драўлянай аздобай: разьбянымі ліштвамі, аканіцамі, парталамі, арнаментаванымі дзвярыма. Гэты цудоўны прыклад драўлянага дойлідства ў свой час дзяржава спецыяльна не занесла ў спіс гісторыка-культурных каштоўнасцяў, каб без праблем вызваліць месца для сучаснай забудовы. За вокнамі ўжо даўно тарабаняць экскаватары і грымяць мантажнікі – насупраць імкліва расце гмах. З астатніх бакоў стары дом даўно абкладзены шматпавярховікамі. Кола сціскаецца…
