Guest
Хьо ца гуш де даьлча, деган малх кхулий, сан сино некъаш до, боданах уьдуш. Хьо гича, безамо мукъамаш кхуллий, синмерзаш хьоьсту сан, дахаре вуьгуш. Хьо гича, даг чохь сан зезагаш довллал, хьо гича, гlелделла бlаьрса дендаллал, хьо гича, мlаьргоно ирсан нур даллал, ма хаза кхоьллина хилла хьо Дала. Кхокханах со тарлой, цкъа тlома волий, мархашка хоьтту ас, «лаьттахь йу» — олу. Цигара чухьодий, самукъадолий, массо а тlулгашка, хьо хоьттий волу. Хьан амат карадац, мел лехарх суна... хьан lиндагl карадац, мел хьежарх суна... хьох полла хили-те, чиркхах лург хьекха, йа мукъам хили хьох, йишйоцург лекха. Беттасин кlоргенехь хьан лар ца йайна. Седарчийн могlарехь хьан са ца дайна. Хьох аса кхоьллина безаман туьйра — гlенашкахь тlам бойна дисина куьйра. Дешалур доцу соь «кхераме жайна» схьадоьллуш, паналлехь хьан седа байна. Овтанах жима суй бисина дела, хьо лоьхуш Iаьршашкахь сан ойла лела... Iай-бIаьсте къаьстачохь ца хези аз хьан, ца карий кху лаьттахь хьан кошан барз а. Делахь а, бIаьргаш дIахьаббича буса, карийра, сайн даг чохь хьо йеха хIусам. Минцаев Iальви шо
