Guest
8-сентябрь 1941-жыл. Туптуура 81 жыл мурда ушул күнү Улуу Ата Мекендик согуштагы эң трагедиялуу этаптардын бири — Ленинград курчоосу башталган. Аталган калаанын жашоочулары фашисттик баскынчыларга 872 күн каармандык менен чыдап, жашап, өлүм, ачкачылык, болуп көрбөгөндөй сыноолор менен күрөшкөн. Ал кезде тышкы дүйнөдөн кабар берген жалгыз гана Ладога көлү — “Өмүр көлү“ менен аба байланышы калган. Фашисттик фюрердин ою боюнча Ленинградды басып алгандан кийин “жер менен жексен болушу керек“ эле. 872 күнгө созулган азап, аяз, кырылган эл – бала-чака, кары-картаңдар, эмгекке жарамдуулар. Бул трагедия 1 миллионго чукул адамдын өмүрүн алып кеткен. Алардын 600 миңге чукулу ачкадан кырылган. Бул адамзат тарыхындагы эң узакка созулган жана эң каардуу курчоо болду. ...1944-жылдын 27-январында чыкылдаган аяздуу күнү блокада жырылып, фашисттик баскынчылардын тилеги таш капкан. 1944-жылдын январында блокада алынгандан кийин да немец жана фин аскерлеринин курчоосу уланган. 1944-жылдын августундагы операциядан кийин гана фашисттер шаардан алыс сүрүлгөн. Блокадада калган Ленинграддан Кыргызстанга 16 миңден ашык адам, анын ичинен 3,5 миң баланын эвакуациялангандыгы айтылып келет. Улуу Ата Мекендик согушка 360 миңден ашуун кыргызстандык катышкан. 4 500дөн ашыгы Ленинградды бошотууда курман болгон. Ленинград блокадасынан Кыргызстанга эвакуациялангандар менен бирге 150 баланы Улуу Ата Мекендик согуш маалында Токтогон Алтыбасарова аттуу каарман инсан багып-өстүргөн.
