Guest
Мошу жилниң 14- 21 октябрь күнлири Қуддус Ғоҗамияров намидики җумһурийәтлик академиялик уйғур музыкилиқ комедия театриниң Яркәнт, Чонжа һәм Челәк йезилиридики гастрольлуқ сәпиридә Уйғур театриниң бәдиий рәһбири режиссер Фархадбек Қанафин, Әдәбият бөлүминиң башлиғи, «Құрмет» ордениниң саһиби Гүлбаһар Насирова, «Нава» фольклор ансамблиниң бәдиий рәһбири Ниязҗан Турсунов һәм баш балетмейстер Һәҗәрбүви Халимовадин тәркип тапқан комиссия әзалири Панфилов, Уйғур вә Әмгәкчиқазақ наһийәлири мәктәплириниң мудирлири һәм орунбасарлири билән учришишлар өткәзди. Мәзкүр учришишниң асасий мәхсити бирла. У болсиму – Уйғур театриға келәчәк яш кадрларни тәйярлаш мәсилисидур. Мошу турғудин улар актер болушни арзу қилидиған талантлиқ қиз-жигитләрниң 2025-26 оқуш жили Т.Жүргенов намидики Қазақ Миллий Сәньәт академиясиниң «Музыкилиқ театр актери» факультетида ечилидиған уйғур бөлүмигә, академия йенидики актерларни тәйярлаш колледжиға қобул қилинидиғанлиғи һәққидики хуш хәвәрни йәткүзди. Шундақла 9 яки 11 синипни түгитип уссулчи һәм нахшичи болушни арзу қилидиған қиз-жигитләрни Ж.Елебеков намидики җумһурийәтлик Эстрада вә Цирк колледжи, Чайковский намидики музыкилиқ колледжи қобул қилидиғанлиғини атап өтти. Мәзкүр оқуш орунлириға чүшүш үчүн тәйярлиқ мәшғулатлирини елип бериш һәққидә кәң чүшәнчә берилди. Кәлгүси һаятини уйғур сәньитигә беғишлашни мәхсәт қилған барлиқ талантлиқ яшлар билән комиссия әзалири буниңдин кейинму учришишларни паал елип баридиғанлиғи, кәспий мутәхәссисләр арқилиқ балиларни язлиқ емтиһанларға беваситә театр мәмурийитиниң тәйярлайдиғанлиғини қәйт қилишти.
