Guest
Улуу кыайыы өрөгөйдөөх күнүн көрсө «Поём двором» диэн бүтүн Россиятааҕы аахсыйа иитинэн уоттаах сэрии кыргыһыытын бэтэрээнэ олорор дьиэтин тэлгэһэтигэр актыбыыстар бырааһынньыктааҕы кэнсиэр оҥордулар. Маннык тэрээһин Дьокуускай куорат Кузьмин аатынан уулусса 34/1 аадырыһыгар буолан ааста. Японияны утары сэрии кыттыылааҕын, Бүлүү улууһун Кыргыдай нэһилиэгиттэн төрүттээх Семен Колтовскайы эҕэрдэлээтилэр. Семен Иванович сэрии иннинэ уонна сэрии бастакы сылларыгар колхуоска биригэдьиирдээбит. 1944 сыллаахха кыһыл армия кэккэтигэр ыҥырыллан 50-с сылга диэри сулууспалаабыт. Онтон кэлэн милицияҕа үлэлээн ис дьыала министиэристибэтин туйгуна, старшина буолбут. Аны күһүн 100 сааһын туолар Семен Колтовскайы «02 Сулууспа» ансаамбыл артыыстара эҕэрдэлээтилэр, кытаанах доруобуйаны, бары үтүөнү баҕардылар.
