ЭКИС-2024 Майаа быыстапка арыллыыта.

Бүгүн, олунньу 15 күнүгэр Р.Г.Васильев аатынан улуустааҕы кыраайы үөрэтэр түмэлгэ Майа сэлиэнньэтигэр тэрилтэлэр бөлөхтөрүн икки ардыларыгар ыытыллар 68-с “В.К.Степанов аатынан култуура уонна спорт эстафетата” бэстибээл иккис түһүмэҕэ – уус-уран оҥоһуктар быыстапкалара аһылынна. Быыстапкаларга туруоруллубут Майабыт талааннаах дьоно-сэргэтэ араас хайысхаларга, араас матырыйаалынан оҥорбут үлэлэрэ хайа да киһини сөхтөрөр. Манна бааллар тимир, мас, муос, көмүс уустарын оҥоһуктара, биирдиилээн уонна бөлөҕүнэн иистэнээччилэр сахалыы таҥастара-киэргэллэрэ, айылҕаттан талааннаах худуоһунньуктар уруһуйдара, дьиэҕэ-уокка, олоххо-дьаһахха туттуллар кэрэ көстүүлээх маллар, сонун хайысхаларга оҥоһуктар, оҕолорго аналлаах бэйэ оҥоһук сыахайдар, араас сайыннарар оонньуурдар, үөрэх тээбириннэрэ. Быыстапканы сыаналыыр дьүүллүүр сүбэ: - Мэҥэ-Хаҥалас уустарын, айар талааннаахтарын түмсүүтүн чилиэнэ, уус-уран оҥоһуктарын маастара, Федор Васильевич СКРЯБИН; - М.К.Попова аатынан Майатааҕы оҕо ускуустубатын оскуолатын уһуйааччыта, Саха Өрөспүүбүлүкэтин култууратын уонна үөрэҕэриитин туйгуна Петр Александрович ПЕТУХОВ; - М.К.Попова аатынан Майатааҕы оҕо ускуустубатын оскуолатын уһуйааччыта, норуот маастара, Саха Өрөспүүбүлүкэтин култууратын туйгуна Александр Григорьевич НЕОБУТОВ; - Саха Өрөспүүбүлүкэтин уран оҥоһуктар маастара, “Уран Майа” иистэнньэҥнэр түмсүүлэрин салайааччыта Надежда Викторовна СЕРГЕЕВА; - Дьүүллүүр сүбэ бэрэссэдээтэлэ ‒ улуустааҕы култуура уонна духуобунай сайдыы управлениетын дизайнера, Саха Өрөспүүбүлүкэтин култууратын туйгуна Светлана Петровна ЧИРИКОВА. Быыстапка түмүгүнэн ларуеаттар, дипломаннар ааттаныахтара, көхтөөх кыттааччыларга, тэрийээччилэргэ биһирэбил грамоталар бэриллиэхтэрэ. Уус-уран быыстапка олунньу 18 күнүгэр диэри дьон көрүүтүгэр турар. Түмэл күн ахсын 9 чаастан 17 чааска диэри үлэлиир. Быыстапканы өрөбүллэргэ эмиэ көрүөххэ сөп. Тапталлаах Майабыт талыы-талба талааннаах дьонугар УРУЙ-АЙХАЛ!