Guest
Анчымаа Саныңмаевна Хертек, Тээли суур, 77 харлыг пенсионер. ТЫВАЛАҢАР. Улуг, биче тыва кижи дөгерези! Уругларже оруставайн, тывалаңар. Чараш сөстүг чечен-мерген төрээн дылын Чажындан-на өөренип, дыңнап өссүн. Тывалажып чугаалашпас болзувусса, Дылывыс шуут чиде берип база болур. Дылын уткан биче чоннар делегейде Дыка көвей – ону бодап, кичээниңер. Тыва кижи төрээн дылын билбес боору Дылывыстың чидериниң демдээ ол-дур. Өгбелерниң төрээн дылын салгалдарже Өөредип дамчытпайн баар кижи ол-дур. Ажы-төлге төрээн дылын өөредири Ада-ие хүлээлгези дээрзин утпа. Оода-ла өг-бүлеге уругларже Оруставайн, тыва дылга чугаалаңар. Көвей санныг улуг чоннар дылдарынга Хөмүрээрти бастырбас дээш, тывалаңар. Төрээн тыва дылывысты чидирбейн, Төөгүге артырар дээш, тывалаңар. Тыва чугаа тоол чурту Тывавыска Дыңналбастап читпезин дээш, тывалаңар. Дылын уткан биче чон деп адатпас дээш, Тывалаңар, дылым бо дээш, тывалаңар!
