Guest
İmom Həsən Əskəri (ə), isna əşəri şiəyoni 11 minə İmome. Əv Hicri Ğəməri 232 minə sori Rəbiussani 8 minə rujədə Mədinə şəhrədə bə dınyo omə iyən de 8 qılə vositə çəy nisbət bə İmom Əli (ə) rəseydə. Çəy buzurqvorə pıə İmom Hadi (ə) be və vədə doə Məhdi (ə) çəy fərzənde. İmom Həsən Əskəri (ə) 20 sor ıştə pıə kənoədə be və imoməti koon əncom doeyədə bəştə pıə komək əki. Çımiku bəpeşt ki İmom Hadi (ə) Əbbosi xəlifəon zindonədə şəhid bıə, İmom Həsən Əskəri (ə) İslomi umməti imoməti hıkmdor bıə. 6 sori mıddətədə ım əmonətış bəştə duşış peqəte. İmom Həsən Əskəri (ə) bənə ıştə buzurqvorə dədə de xəlifəon həmmə ciddiyətion və nəzorəton vıcudi, həmişə de şiəyon ıştə rabitə hifz əki. İmom Sadığ (ə)-i zəmoniku vəkilonku i qrup, de İmom, milləti rabitə bərğəror kardey ehdəşon be. Im niyoni qrupi fəoliyət, İmom Həsən Əskəri (ə)-i zəmonədə de şiddətin əlovə bıə, boçi ki ə Həzrəti zəmonədə İslom həmmə dınyoədə, şiəyon əlovə bıən. Şiəyon qırdbemoni mərkəzon hevujəti, bə qıləy ğaydəsə noə rabitə təşkiloti ehtiyocış be ta itərəfiku de imoməti hissə, şiəyon miyono vəhdət icod bıko və co tərəfiku deyande çəvon rabitə bərğəror bıbu. İmom Həsən Əskəri (ə), şiəyon məşhurə şəxsiyəton və əla simonom miyoniku nımoyəndəoni vıjnişe və mıxtəlifə məntəğəonədə təyinış kardə və ım royku deştə tərəfdoron rabitə bərğəror əki. Çən İmom Həsən Əskəri (ə)-i vey muhimmə koonku qıləyni bo İmom Əskəri (ə)-i ğeybəti ğəbul kardeyro İslomi iştimoiyəti hozzo kardey be. Ə Həzrət səy və cəhd kardışone ki bə şiəyon omuton ki İmom Məsum (ə)-i ğeybəti zəmonədə de diğğət bə dini məarifon, çoknə bəpe ıştə ictimoi və dini problemon həl bıkon.
