Guest
Тропарь: Я́ко свети́льницы яви́стеся всесве́тлии во ото́це окиа́на мо́ря, преподо́бнии отцы́ Зоси́мо, Савва́тие и Германе вы бо крест Христо́в на ра́мо взе́мше, усе́рдно Тому́ после́довасте и, чистото́ю Бо́гови прибли́жившеся, отону́ду си́лами чуде́с обогати́стеся. Те́мже и мы любе́зно притека́ем к ра́кам честны́х моще́й ва́ших и уми́льно глаго́лем: о преподо́бнии, моли́те Христа́ Бо́га спасти́ся душа́м на́шим. Ин тропарь: По́стническое и равноа́нгельское житие́ ва́ше, преподо́бнии отцы́ Зоси́мо, Савва́тие и Германе, вселе́нней позна́ны сотвори́ вас; чудодея́нии разли́чными, Богоно́снии, просвеща́ете ве́рою призыва́ющия вы и чту́щия честну́ю па́мять ва́шу. Кондак: Христóвою любóвию уязви́вшеся, преподóбнии, и Тогó крест на рáмо взéмше, понесли́ естé, божéственне вооружи́вшеся на неви́димыя враги́ и, непрестáнныя моли́твы я́ко копиé в рукáх имýще, крéпко победи́ли естé бесóвская ополчéния; благодáть Госпóдню приéмше цели́ти недýги душ и телéс притекáющих ко святы́м мощéм вáшим, чудéс лучи́ испущáете всю́ду. Тем зовéм вам: Рáдуйтеся, преподóбнии отцы́ нáши Зоси́мо, Саввáтие и Гéрмане, монáхом украшéние. Величание: Ублажа́ем вас, преподо́бнии отцы́ на́ши Зоси́мо, Савва́тие и Ге́рмане, и чтим святу́ю па́мять ва́шу, наста́вницы мона́хов, и собесе́дницы А́нгелов.
