Вакі правяраюць чужое логава на сваёй тэрыторыі

Малады воўк Мікола (пазначаны ашыйнікам) са сваім сямейнікам прыйшоў праверыць чужое логава на тэрыторыі сваёй зграі. Ён кульгае на адну лапу, якую параніў увесну. Дзе і як Мікола атрымаў траўму, невядома. Яго сям’я жыве ў запаведнай зоне Белавежскай пушчы, але тэрыторыя зграі выходзіць за межы не толькі гэтай зоны, але і за межы Нацпарку. А гэта нясе павышаную рызыку. Ваўка мог траўмаваць чалавек або ён мог выпадкова пашкодзіць лапу, захраснуўшы ёй дзе-небудзь. На шчасце, Мікола не адзіночка, а жыве ў зграі, якая дапамагае яму. На 9-й секундзе ў кадры за паваленым бервяном з’яўляецца трэці воўк. Даследаванне воўка праводзіцца ў межах Праграмы ў падтрымку запаведнасці Белавежскай пушчы, якую АПБ ажыццяўляе разам з Нацпаркам пры падтрымцы Франкфурцкага заалагічнага таварыства.