Guest
Бул жолу Улуттук онкология борборунун радиогинекология жана брахитерапия бөлүмүнүн башчысы Чынара Батырканова менен маектештик. Дарыгер аталган бөлүмдө дээрлик 30 жылдан бери иштейт. Биз андан аялдардын жатын моюнчасындагы рак илдети, анын пайда болуусу, дарылоо жолу, дарылоодогу көйгөйлөр тууралуу сурадык. Баарлашуу учурунда Батырканова Советтер Союзу кезинде, андан кийинки мезгилде деле ракка кабылгандар оорунун 3-4-стадиясында келсе бүтүндөй дарыгерлер түп көтөрүлүп, бейтаптын кеч келгендиги министрликтин деңгээлинде талкууланчу, азыр, тескерисинче, 1-2-стадияда келгендерди көрсөк таң калабыз деп кейип отурду. Адистин айтымында, бейтаптар дарыгерлерге оору өтүшүп кеткенде кайрылгандыктан жарымы айыга албайт. “Аялдар эч жери оорубаса деле жылына бир-эки жолу гинекологго кайрылып турушу керек. Себеби рактын баштапкы учурларында такыр белги болбойт, оорутпайт. Ошондой текшерүү жолу менен кайсы бир вирус, оорулар болсо аныктап, дарылап койсок бул залалдуу шишиктин алдын алган болобуз. Мына бизге келип, дарыланып жаткандардын көбү 10, 20, 30 жыл бою гинекологго көрүнбөгөндөр, кичүү баласын төрөгөн, ошол бойдон дарыгерге барууну унутушкан“, — деди маектешим. Ал аялдарды ден соолукка жоопкерчиликтүү мамиле жасоого чакырды. “Тойго, карым-катышка барганга, салонго акча табылат. Анан жылына бир ирет гинекологго барганга каражат табылбай калабы? Ал тургай унааларды деле жылына бир жолу текшертип жатабыз, бул эреже. Адам деле өзүнө ушундай эрежени киргизип алышы керек“, — деди ал. Батырканова ракты папиллома вирусу козгой турганын белгилеп, бул оору адамдан адамга жыныстык жол аркылуу жугарына токтолду. Айтымында, вирусту дарыласа болот, дарылабай оору өтүшүп кетсе, башка өнөкөт оорулар же сезгенүүлөр менен залалдуу шишикке айланат.
