Guest
Бүгүн ыам ыйын 24 күнүгэр дойдубут бары оскуолаларыгар тиһэх чуораан чугдаарда. Бу үөрүүлээх күнүнэн улуус, нэһилиэк дьаһалтатын, улуустааҕы үөрэх салалтатын, төрөппүттэр ааттарыттан эҕэрдэ тыллар этилиннилэр, үөрэнээччилэргэ, учууталларга ситиһиилэрин иһин грамоталар, эҕэрдэ, махтал суруктар туттарылыннылар. Быйылгы уерэх сылыгар төрдүс кылааһы 8 уол оҕо, тохсус кылааьы 9 уолан уолаттар уонна 2 кыталык кыргыттар бүтэриэхтэрэ. 2023-2024 сыл выпускник үрдүк аатын 5 кындыа кыталык кыргыттар, 4 үрүҥ уоланнар ылан, оскуоланы бүтэрэн, олох киэҥ аартыгар үктэниэхтэрэ. Билигин оскуоланы бүтэрээччи оҕолорбутун биир кэлим эксээмэннэр күүтэллэр. Бастакы эксээмэннэр ыам ыйын 28 күнүттэн саҕаланаллар. Онон, оҕолорбутун тиһэх чуораанынан эҕэрдэлээн туран, эксээмэннэрин ситиһиилээхтик туттаран, сөбүлүүр идэҕитин талан, баһылаан, үлэни өрө тутар дьон буолуоххут диэн эрэнэбит. Билиини биэрбит, бары үчүгэйгэ, үтүөҕэ ииппит үөрэххит кыһатыгар, учууталларгыт кыһамньыларыгар өрүү махталлаах буолуҥ, олоххо тутуһан бииргэ түмсүүлээхтик сылдьыҥ, чэгиэн сылдьан үрдүк сыалгытын ситиһиҥ, дьоллоох буолуҥ! Төрөөбүт дойдугутугар бэриниилээх буоларга тардыһыҥ, сайыннарыҥ, тус ситиһиилэргитинэн дойдугутун, дьоҥҥутун ааттатыҥ.
