Guest
Иуæндæсæмкъласон Амина Алиева кæддæриддæр ахуыр кодта иттæг хорз. 26-æм скъолайы фидæны рауагъдон сызгъæрин майданмæ æнтыстджын къахдзæфтæ кæны. Йæхæдæг куыд зæгъы, афтæмæй йæм ногдзинæдтæ базонынæй хуыздæр ницы кæсы. Иумæйаг паддзахадон фæлварæн дæтдзæн литературæйæ, фæнды йæ дарддæр дизайнерыл ахуыр кæнын. Йæ бæллиц у Мæскуымæ ацæуын. Ныртæккæ та уал йæхи цæттæ кæны ахуыры азы кæронмæ. Æмæ дæ кæд майдан хъæуы, уæд хъуамæ хистæр кълæсты сыгъдæг фондзтæ исай. Уый у æртæ домæнæй иу. Иттæг хорз бæрæггæнæнтæ æппæт предметтæй. София Нациевская дæр сызгъæрин майданмæ тырны. Йæ бæллиц — ветеринарон факультет Мæскуыйы. Профилон цы предметтæ не сты, уыдон ахуыр кæны йæхæдæг, æнæ репетитротæй. Ахуыргæнджытæ сывæллæттæн æххуыс кæнынц сæ рæзтмæ цæст дарын, стæй къуылымпыдзинæдтæ кæм æвзарынц, уымæ дæр. Иумæ кусгæйæ, сызгъæрин майдан райсын зын нæу. Уæдæ Гæбуты Хъазыбег та фидæны прокурор у. Уырзы рæстдзинады уæлахиз. Иннæ медалисттау, тырны Мæскуымæ. Сызгъæрин, æцæгдæр, бюджетмæ бахауынæн æххуыс у. Медалисттæн уæлдæр ахуыргæнæндæтты дæттынц уæлæмхасæн балтæ. Цал, уый алы ахуырдон снысан кæны йæхæдæг. Балтæ æппынфылдæр сты дæс. Фæлæ сæ райсынæн æрмæст фондзтæ нæ хъæуы, фæлæ ма уырыссаг æвзаджы æмæ ма иу равзаргæ фæлварæны 70 баллы æрæмбырд кæнай. Скъолаты æвзист майдантæ дæттын фарон райдыдтой, фæлæ цалдæр домæнимæ. Дæсæм æмæ иуæндæсæм къласы дын хъуамæ цыппар цыппарæй фылдæр ма уа, иумæйаг паддзахадон фæлварæны та уырыссаг æвзагæй æмæ ма иу равзаргæ фæлварæнæй 60 баллы æрæмбырд кæнай. Уæд æвзист майданмæ дæр хауы уæлæмхасæн балтæ. Цæгат Ирыстоны Ахуырады министрад зæрдыл лæууын кæны, равзаргæ предметæй фæлварæн раттæн ис дыккаг хатт дæр, кæд раздæры бæрæггæнæн зæрдæмæдзæугæ нæ рауад, уæд. Фарон республикæ рауагъта 611 медалисты. Сæ фылдæр райстой сызгъæрин. Рагагъоммæ бæрæггæнæнтæм гæсгæ, ацы аз сæ нымæц фылдæр уыдзæн. Профилон бæрнады хуыздæр рауагъдонты хъысмæтмæ цæст дарынц, ныры иуæндæсæмкъласонтæн семæ фæмбæлдтытæ скæнынц. Уый руаджы фæсивæды фылдæр ныфс бацæуы.
