Guest
Бүгүн Муус устар 2 күнүгэр “Төрүт киһи төрүөҕэ, ытык киһи ыччата“ диэн саха литературатын төрүттээччи Алексей Елисеевич Кулаковскай - Өксөкүлээх Өлөксөй уола Реас Алексеевич Кулаковскай төрөөбүтэ 110 сылыгар, сиэнэ Атос Реасович төрөөбүтэ 85 сылыгар аналлаах бэлиэ тэрээһиннэр буоллулар. Бэлиэ тэрээһин Сэһэн Ардьакыап аатынан историяны кыраай үөрэтэр түмэлгэ Кулаковскайдар Уус-Алдаҥҥа олохторун кэпсиир быыстапка арыллыытынан саҕаланна. Кулаковскайдарга анаммыт бэлиэ тэрээһиҥҥэ биллиилээх учуонайдар, суруйааччылар, артыыстар уонна Реас Кулаковскай сыдьааннара кыттыыны ылыллар. Салгыы тэрээһин кыттыылаахтара “Тойон Мүрү“ култуура дыбарыаһыгар “Кулаковскайдар Уус-Алдаҥҥа олорбут, айбыт сылларын ахтар, ырытар иһитиннэриилэрдээх конференцияҕа муһуннулар. Маны таһынан, Реас Кулаковскай сөбүлээн дьарыктаммыт спордугар түргэн шахмакка оскуола оҕолорун икки ардыларыгар улуус турнира эбии үөрэх киинигэр ыытылынна. Бу күрэххэ барыта 50-тан тахса саахымаччыт оҕолор кыайар туһугар күөн көрүстүлэр. Түмүккэ улууска ыытыллыбыт Реас Кулаковскай айар үлэтин, олоҕун туһунан викторина уонна эссе суруйуутугар күрэх кыайыылаахтарын наҕараадалаатылар. Ити курдук сүдү киһи сыдьааннара Реас уонна Атос Кулаковскайдар айбыт үлэлэрэ Саха норуотун духуобунай култууратын сүдү кылаатынан буолаллар. Тимур Макеев, Ивалина Домотова, Айсен Кутуков “Өркөн“ оҕону эбии үөрэхтээһин киинин эдэр корреспонденнара, Уус Алдан.
