Guest
Күндү ааҕааччылар! Бүгүҥҥү үөрүүлээх Саха Өрөспүүбүлүкэтин күнүнэн итиитик-истиҥник эҕэрдэлиибит! 1922 с. муус устар 27 күнүгэр Саха Автономнай Сэбиэскэй Социалистическай өрөспүүбүлүкэтэ тэриллибитэ. Бу Сахабыт сирин сайдыытыгар улахан суолталаах Саха Автономнай Сэбиэскэй Социалистическай Өрөспүүбүлүкэбитин төрүттэспит итиэннэ ону олоххо киллэрсибит дьоммутун – Былатыан Ойуунускайы, Максим Аммосовы, Исидор Бараховы, Степан Аржаковы, биир дойдулаахпыт Иван Винокуровы, онтон да атыттары өрүү махтана ахтабыт, саныыбыт, өйдүүбүт. Саха Өрөспүүбүлүкэтин судаарыстыбаннаһын төрүттэниитэ саха норуота сайдыытыгар олук уурбута. Култуурабыт, духуобунаспыт өрө тутуллан, өрөспүүбүлүкэбит элбэх омуктаах норуота сомоҕолоһон, олоҕу саҥалыы тутууга көхтөөхтүк ылсыбыта. Ити кэмтэн ыла үгүс сыл устата Саха сирэ, ол иһигэр биһиги Чурапчыбыт улууһа дойду социальнай-экономическай сайдыытыгар, Арассыыйа норуоттарын баай култууратыгар бэйэтин дьоһун кылаатын киллэрсэн кэллилэр. Саха Өрөспүүбүлүкэтэ Уһук Илиҥҥэ биир тэтимнээхтик сайдан иһэр эрэгийиэн быһыытынан дьоно-сэргэтэ санаата бөҕөх, сомоҕолоһууга үрдүк дьулуһуулаах уонна модун кыахтаах биир кэлим дойдуга олорорго баҕалаах норуот быһыытынан инникигэ эрэллээхтик хардыылыыр. Дьоһун түгэнинэн эһиэхэ барыгытыгар дьолу-соргуну, чэгиэн-чэбдик буолууну, үлэҕитигэр уонна тус олоххутугар ситиһиилэри баҕарабыт!
