Guest
2023 сыл бэс ыйын 16 күнүгэр Амма улууһун бастакы кулубата Афанасий Петрович Рязанскай төрөөбүтэ 150 сылыгар аналлаах Соморсун нэһилиэгин уйгу-тунах ыһыаҕа Амма эбэ кэрэ кытылыгар Тойон түһүлгэҕэ үрдүк таһымҥа ыытылынна. Биэриигэ ыһыах күндү ыалдьыттара Афанасий Рязанскай төрөппүт сиэнэ Александра Ноева уонна чугас аймаҕа Татьяна Шергина ахтыылара киирдилэр. Бу күн биир бэлиэ тэрээһининэн Соморсуҥҥа киириигэ трасса хаҥас өттүгэр “Сэһэн“ диэн төрөөбүт түөлбэ историятын кэпсиир сквер үөрүүлээх быһыыга-майгыга арыллыбыта буолар. Сквер историческай чахчыларын биллэр кыраайы үөрэтээччи Михаил Алексеев оҥорбут. Аныгылыы тупсаҕай көстүүлээх, дьон сынньанарыгар анаан оҥоһуллубут сквер сүрүн бэдэрээтчитэ “Диапазон“ ХЭТ, ону тэҥэ “Вега“ тэрилтэ буолаллар. Манна аан бастаан 1998 сыллаахха оччотооҕу улуус баһылыга Дмитрий Наумов көҕүлээһининэн Афанасий Петрович Рязанскай төрөөбүтэ 125 сылыгар Афанасьевскай часовня тутуллубута. Архитектор Софья Васильева бырайыактаан, болуотунньук Николай Кононов тутуу биригээдэтэ оҥорбуттар. Салгыы 2014 сыллаахха Соморсун нэһилиэгэ историческай докумуоҥҥа ахтыллыбыта 375 сылыгар баһылык Петр Лебедев иилээн-саҕалаан, номоххо киирбит аҕа ууһу төрүттээччи Соморсун Баатыр пааматынньыгын скульптор Николай Чоччасов туруорбута. Онтон быйыл улуу биир дойдулаахпыт Амма улууһун тэрийбит, бастакы улуус кулубата Афанасий Рязанскай төрөөбүтэ 150 сылыгар анаан олохтоох көҕүлээһиннэри өйүүр бырагыраамаҕа кыттан кыайан, баһылык Алексей Кононов тэрийиитинэн бу икки история пааматынньыктарын холбуур сквер оҥоһулунна. Ыһыах үөрүүлээх аһыллыытыгар Амма улууһун баһылыга Степан Кузьмин кытынна. Үрүҥ Тунах ыһыах биир долгутуулаах түгэнинэн “Соморсун нэһилиэгин бочуоттаах олохтооҕо“ үрдүк ааты СӨ тыатын хаһаайыстыбатын туйгуна Галина Заборовскаяҕа, СӨ культуратын туйгуна Мария Старостинаҕа уонна спорт бэтэрээнэ Александра Ноеваҕа иҥэрдилэр. Биэриини бэлэмнээтэ Вера Иванова #yakutia #амга #амма #нвксаха #сахасирэ #якутия #соморсун #афанасийрязанский #аммабастакыкулубата #150 #ыһыах #ысыах
