Guest
Мандарин срæгъæд ис, уый базонынц йæ хуызмæ гæсгæ. Нæ республикæйы ацы зайæгой ныллæг температурæты аххосæй парахат кæнын æнцон хъуыддаг нæу. Уарзы хъарм климат. Хурæй æфсæст куы нæ ййафа, уæд йæ сыфтæ азгъæлдзысты, бæлæсæн та тæссаг у бахуыс уæвынæй. Фæлæ Хæххон паддзахадон аграрон университеты арæзт ис æппæт уавæртæ дæр. Алы зайæгойæн дæр скодтой æмхуызон уавæртæ. Æдæппæтæй ис æртæ оранжерейы. Хъарм, æрдæгхъарм æмæ уазал. Ацы хауы æртыккаг хуызмæ. Ам температурæ вæййы 1-æй 8 градусы онг. Æрмæст мандаринтæ дзы нæ зайы. Ис дзы дæсгай культурæтæ: гранат, легъуи, лимон, апельсин. Суанг ма дзы томаты бæлас дæр ис. Оранжерей арæзт æрцыд 1991-æм азы. Студенттæ æмæ профессор Гæздæнты Азаны фæрцы ацы бынат бæркадджын уыд. Хæххон паддзахадон аграрон университеты уæды ректоры хъæппæрисæй фæлварæн хуызы кодтой иртæстытæ, байгом дзы ис ахуырадон-кондадон рæзæндон дыргътæн. Бахаста стыр æвæрæн æрмæст универститеты рæзтмæ нæ, фæлæ æмткæй аграрон наукæмæ. Уый фæрцы студенттæ фæллойыл ахуыр кæнынц ныр дæр. Уалдзæджы студенттæ райдайдзысты бæлæстæ æхсæдын. Уый фæстæ сæ бафсаддзысты пайдайаг хъацæнтæй æмæ сæм базилдзысты. Алы зайæгоймæ дæр ис бæстон æркаст. æрыгон адæмæн æппæт ацы архайд хæссы æхцондзинад, уыимæ ма сын фидæны куысты дæр уыдзæн пайда.
