Guest
Саха эстрадатын чаҕылхай ырыаһыта, СӨ култууратын туйгуна Вера Никифорова төрөөбүтэ 65 сылыгар, кини сырдык аатын кэриэстээн, талба талааныгар сүгүрүйэн бииргэ төрөөбүттэрэ, аймахтара, доҕотторо, биир дойдулаахтара “Мин ыллыыр ырыакам...” диэн эстраднай ырыаны биирдиилээн толорооччуларга өрөспүүбүлүкэтээҕи ырыа күөн күрэһин аан бастакытын үрдүк таһымҥа тэрийэн ыыттылар. Күөн күрэс ыытылларын көҕүлээбит, бэйэтэ анаан-минээн кэлэн тэрийсибит, дьүүллүүр сүбэ бэрэссэдээтэлинэн үлэлээбит Вера Прокопьевна чугас дьүөгэтэ, СӨ үтүөлээх артыыһа Мария Данилова буолар. “Вера Никифорова сулустаах чааһа 90-с сылларга күүскэ умайбыта. Вера – көстөр көрүҥнүүн, тутта-хапта сылдьардыын, куолаһын диапозонунуун, таҥастыын-саптыын дьиҥнээх улахан, үрдүк таһымнаах артыыска этэ”, - диэн саха норуодунай артыыһа Александр Бурнашев бэйэтин “Көмүс ааттар” биэриитигэр истиҥник, киэн тутта ахтар. Чахчы, Вера Никифорова ырыалара бары хит буолбуттара. Кини репертуарыгар саха дьоно уостан түһэрбэккэ ыллыыр биир дойдулаахпыт Дмитрий Емельянов “Баҕа санаа“, Аркадий Алексеев “Илиибин уунабын эйиэхэ”, Виталий Власов “Күүтэбин, кэлиий дуу” диэн, онтон да атын истиҥ иэйиилээх ырыалар бааллар. Ол курдук репертуарга улахан болҕомтотун уурара диэн бииргэ алтыспыт доҕотторо бэлиэтииллэр. Кулун тутар 30 күнүгэр Вера Прокопьевна төрөөбүт түөлбэтигэр Алтан нэһилиэгэр Валерий Ноев аатынан сынньалаҥ киинигэр Амма, Чурапчы, Мэҥэ Хаҥалас, Уус Алдан, Усуйаана улуустарыттан уонна Дьокуускай куораттан – барыта 21 кыттааччы кэлэн, бииртэн биир киһи сүрэҕин ортотунан киирэр ылбаҕай ырыалары толорон, көрөөччүлэр дууһаларын абылаатылар, куттарын-сүрдэрин туттулар. Түмүккэ Гран-при үрдүк аатын Сатаҕай нэһилиэгиттэн төрүттээх Дьокуускай куоракка олорор, үлэлиир, Сергей Зверев-Кыыл Уола аатынан Үҥкүү тыйаатырын солиһа, эдэр кэскиллээх ырыаһыт Александр Карманов ылан, Вера Никифорова бииргэ төрөөбүттэрэ уонна аймахтара туруорбут 65 000 солк. суумалаах бирииһинэн наҕараадаланна. Маны таһынан Вера Прокопьевна ийэтин өттүнэн Киренскэйдэр аймах харчынан бириистэрин тутта. Биэриигэ Вера Никифорова туһунан Павел Неустроев видеосюжетын уонна Александр Бурнашев “Көмүс ааттар“ биэриититтэн материаллары туһанныбыт. Вера ИВАНОВА #эстрада #саха #события #якутия #yakutia #сахалыы #амга #лайк #репост #подписка #песня #вера #никифорова #певица #память #конкурс #концерт #хит #хиты
