Guest
Чурапчы улууһугар дьиэ кэргэни бөҕөргөтөр сыаллаах сыл ахсын араас далааһыннаах үлэ ыытыллар. Ол курдук, «Аҕа — ыал олоҕун сүрүннээччи, кэскиллээх өйү-санааны киллэрээччи» диэн төрдүс төгүлүн ыытыллар эр дьон форумун тэрийэн ыыттылар. Тэрээһин сүрүн сыала — аҕа оруолун үрдэтии, дьиэ кэргэҥҥэ оҕону таба иитии, итиэннэ истиҥ сыһыаны иҥэрии буолар. Форум түөрт түһүлгэнэн үлэлээтэ. Манна нэһилиэк аҕалара оҕону иитии суолтатын, оҕону сөбүлүүр дьарыгар угуйуу туһунан кэпсэттилэр, сүбэ-ама биэрдилэр. Маны таһынан, билиҥҥи бириэмэҕэ бэйэ дьарыгын арынан эбии дохуоту киллэрии, социальнай көмөлөрү таба тайанан туһаныы туһунан аһаҕас кэпсэтии ыыттылар.
