Guest
Уның бала сағы булмаған да тиерлек. Кесе йәштән йыл әйләнәһенә хужалыҡ эштәрендә лә, ҡырҙа ла тир түгергә тура килгән. Рифҡәт Баяновтың атаһын 1930 йылда кулаклыҡта ғәйепләп Мәскәүгә ебәрәләр. Әсәһе һигеҙ бала менән тороп ҡалған. 1944 йылда Рифҡәт Баянов Бөйөк Ватан һуғышына үҙе теләп китә. Хәрби әҙерлек курсы үткәндән һуң Силәбе өлкәһендәге Копейск ҡалаһында эске эштәр ғәскәрҙәрендә хеҙмәт итә, артабан Латвияға ебәрәләр. Ул ваҡытта Латвияла хуторҙарҙа бандит төркөмдәре күп була. Урамдарҙа уларҙың эҙенә төшөү буйынса операцияларҙа ҡатнаша. Еңеүҙе ул Латвияла ҡаршы ала. Шул уҡ частә хеҙмәтен дауам итә. 1949 йылда Саҡмағош районындағы тыуған ауылы Иҫке Үҙмәшкә икенсе төркөм инвалиды булып әйләнеп ҡайта. Колхозда хисапсы булып эшләй. Тормош иптәше менән 70 йылға яҡын ғүмер итеп биш балаға ғүмер биргәндәр. Ҡәһәрле һуғыш Әфиҙә Баянованы ла атайһыҙ ҡалдыра. Фронттан уның бер генә хаты килгән. 92 йыл ғүмер эсендә уларҙың башынан кисермәгәне ҡалмаған. Ҡартлыҡ көнөбөҙ бәхетле заманға тура килде тиҙәр.
