Guest
Ул ысын ер кешеһе, тиҙәр Глүс ағай Ситдиҡов кеүектәр тураһында. Бәхетен ситтән эҙләп интекмәй, тыуған Үрмәтендә төпләнеп ҡала. Уны ҡара ерҙән, тыуған ауылы ҡырҙарынан, ғәзиз тупрағынан таба. Эшенә бар булмышы, күңеле менән бирелгән, хеҙмәтен яратып башҡарған, ғүмер буйы һөнәренә тоғро ҡалған ауылдашыбыҙҙың тормош юлы күптәргә үрнәк булырлыҡ. Бала сағынан техниканы ярата. Мәктәпте тамамлағас, күңелендә үҙ-үҙенә ышаныс, тыуған ерендә мул игендәр үҫтереү теләге алға әйҙәй йәш егетте. Беренсе хеҙмәт көнөнән башлап, 51 йыл хеҙмәт һала, төрлө техниканы үҙенә буйһондороп, миллионлаған бураҙналар һыҙа, икһеҙ-сикһеҙ күләмдә иген бөртөктәре үҫтереүгә үҙ өлөшөн һала. Иртә яҙҙан ҡара көзгә тиклем баҫыу-ҡырҙарҙы иңләһә, ҡышын һалам тарттырыуҙа, ремонт эштәрендә ҡатнаша. Эшләү барышында юлда ватылып ҡалған саҡтары ла була. Техниканы биш бармағы кеүек белгән, тойомлаған механизатор унда ла юғалып ҡалмай. Фиҙаҡәр хеҙмәте, тырышлығы һөҙөмтәһендә Глүс ағай күп тапҡыр район батыры булып ҡала, социалистик ярыштарҙа еңеп сыға, грамоталар, маҡтау ҡағыҙҙарына эйә була, ҡиммәтле бүләктәр менән бүләкләнә. “Хеҙмәтеңде бәйәләүҙәре күңелле, тик минең өсөн иң мөһиме ошолар түгел. Тигеҙ тишелгән ужымдарға, ваҡытында яуған ямғырҙарға, күкрәп үҫкән иген баҫыуҙарына ҡарап һөйөнәм. Районыбыҙҙың ауыл хужалығы өлкәһендәге яңылыҡтары менән танышып барам. Ер эше еңелдәрҙән түгел, хеҙмәтеңде ысын күңелдән башҡарһаң ғына ҙур уңыштарға ирешеп була”, – тип тамамланы һүҙен алдынғы механизатор, хөрмәтле ауылдашыбыҙ 5-се класс уҡыусылары менән осрашыуға килгәс. Ысынлап та, хезмәт кешене биҙәй тип юҡҡа ғына әйтмәгәндәр. Глүс ағай, уның ғаиләһе тырыш, уңған булыуҙары менән матур. Тырышҡан кеше барын да булдыра. Күптән түгел Глүс ағайға 69 йәш тулды. Уға алдағы тормошоңда ныҡлы сәләмәтлек, аяҙ күк йөҙө,бөтмәҫ-төкәнмәҫ көс-ҡеүәт теләйбеҙ!
