Guest
Молитва вдовы о защите, о помощи, о просвещении и умягчении обидчиков (составлена св. равноапостольной Великой княгиней Ольгой) О, преми́лостивый Го́споди Бо́же мо́й Иису́с Христо́с, прильпе́ душе́ моя́ по Тебе́, и мене́ прия́т десни́ца Твоя́: приклони́ у́хо Твое́ ко мне́ и услы́ши моли́тву мою́. И да́й ми́ пу́ть обрести́, и́мже ми́ получу́ угоди́ти Тебе́: бо жа́жду исто́чника спасе́ния. Помо́щник ми́ бу́ди и не оста́ви мене́, Бо́же Спаси́телю мо́й, я́ко Оте́ц мо́й и ма́ти моя́ оста́виста мя́, и супру́га лише́на бы́х; от него́ же еди́наго сы́на прижих, и то́й непокорен и неве́рен, та́коже и лю́дие неве́рни. Ты́ же, Го́споди, еди́ну мя́ на упова́ние призва́л еси́. А́з же, Го́споди, на ми́лость Твою́ упова́х и на пучи́ну щедро́т Твои́х наде́жду душа́ моя́ возлага́ю и, к Тебе́ прибега́я, молю́ся: научи́ мя́ твори́ти во́лю Твою́ и спаси́ мя́ от ро́да сего́ стропти́ваго, мно́жества неве́рных люде́й. А́ще они́ заблудили су́ть от Твоея́ благода́ти, но Ты́, Влады́ко, человеколю́бия Своего́ ра́ди, не пре́зри и́х, но посети́ и в ра́зум призови́, и своему́ позна́нию приведи́. Я́коже и от мене́ дре́вле учуженую присво́ил еси́ достоя́нию Твоему́, та́ко, Го́споди, и лю́ди сия́, боля́щая неве́рием, исцели́ благове́рием и, к Себе́ обрати́в, привлецы́, да и ти́, не́когда просвеще́нии Тобо́ю бы́вше, просла́вят и́мя Твое́ Пресвято́е Отца́ и Сы́на и Свята́го Ду́ха в ро́д, и в ро́ды, и вове́ки.
