Guest
Сен яраткъан эр бир куньге шукюр дейим, Къальбим джошып, эр ань тек сени динълейим, Дуа этип санъа ялвармакъ истейим, Сенинъ аджиз къулынъ олам, эй, Аллахым! Дёрт тарафтан джамилерге эсе рузгяр, Къурулгъан яш диварларгъа эте зарар, Кокке бакъкъан минарени къаплай эфкяр, Умютимиз ялынъыз санъа, эй, Аллахым! Ель уфюрте ябанларны башкъа ильден, Йыкъылмасын бу диварлар акъ темельден, Сафларымыз имдат арай Хакъ элинде, Тут уджундан бу рузгярны, эй, Аллахым! Эдждатларнынъ эзан сесин айдамасын, Динимизде миллетимни айырмасын, Тынч олмагъан улькелерни анъдырмасын, Дуамызны къабул эйле, эй, Аллахым! Сакъла бизни, озюмизни биз джоймайыкъ, Эдждатларнынъ багъларыны ич къыймайыкъ, Бир-бирине далларынъны сыкъ байлайыкъ, Авучына ал халкъымны, эй, Аллахым!
