Guest
Madinada nozil bo’lgan bu sura o’ttiz sakkiz oyatdan tashkil topgan. Unda so’z asosan Alloh yo’lida jihod qilish va u jangda rioya qilinishi lozim bo’lgan tartib-intizom va qonun-qoidalar haqida boradi. Shuning uchun uni «Jang» surasi ham deb ataydilar. Bu surada mo’minlarga agar ular Allohning diniga yordam bersalar, Alloh taolo ham ularning yordamida bo’lishi ta’kidlanadi. Shuningdek, ro’baro’dagi dushmanga qarshi jang qilish bilan birga, oralaridagi munofiqlardan ham ogoh-ehtiyot bo’lib turish lozimligi uqtiriladi va ularning ayrim sifat-kirdikorlari ancha batafsil bayon qilinadi. Sura nihoyasida Tangri taolo mo’min-musulmonlarga O’zi ular bilan birga ekanligini uqtirib, ularni Haq yo’lida sustlashmay-og’ishmay sa’y-harakat qilaverishga da’vat etadi. Bu sura payg’ambar alayhis-salom nomlari bilan «Muhammad», deb atalgandir.
