Guest
📢 Калыкым волгалтарымаш пост: «Книгагудысо йӱд» – лудмашлан пӧлеклалтше идалыкысе тӱвыра калык акций, тудо вӱдшор тылзын 18-ше кечынже Россий мучко палемдалтеш. Тиде йӱдым книгагудо, книга кевыт-влак, арт да сылнымут тоштер-кумдык шке паша жапшым шуя. Мероприятийын тӱҥ шонымашыже – книгагудым, тоштер да книга пашам вияҥдаш, лудмын кӱлешлыкым ончыкташ, калык коклаште у тӱвыра канышым эртараш. Тиде ийын эпидемий лиймылан кӧра «Книгагудысо йӱд» Российысе онлайн-марафон #75словПобеды радамыште вӱдшор тылзын 25-ше кечынже толеш да ага тылзын 9-ше кечынже пыта. Акций Кугу Ачамланде сарыште сеҥымылан пӧлеклалтше лиеш. Вӱдшор тылзын 25-ше кечынже 16:00 шагатлан «Книгагудысо йӱдын» официальный верыште кумдан палыме артист, серызе, тӱвыра да спорт пашаеҥ-влак чыла элнан книгагудо пашаеҥ-влак дене пырля марафоным почыт. Нуно эфирыште Кугу Ачамланде сар жапысе серыш-влакым, тыл да фронтысо йӧратыме книга гыч ужаш-влакым лудыт, вара эстафетым мыланна пуат. Кажне еҥ онлайн марафон деке ушнен кертеш.
